இராமநாதபுரம் மாவட்டம் உத்தரகோசமங்கை அருகே சுமார் 23௦௦ ஆண்டுகள் பழமையான சங்ககாலத்தைச் சேர்ந்த இரு ஊர்கள் கண்டுபிடிப்பு தொல்லியல் துறையினர் அகழாய்வு செய்யக் கோரிக்கை

  

கானத்திடல் பகுதியில் உள்ள பண்ணைக்குட்டை

தமிழகத்தை ஆண்ட சேர சோழ பாண்டியர்களில் மிகப்பழமையானவர்கள் பாண்டியர்களே. பாண்டிய மன்னர்களின் ஆட்சிப்பகுதிகளில் ஒன்றாக இராமநாதபுரம் மாவட்டம் விளங்குகிறது. இராமேஸ்வரம் போன்ற ஊர்களின் இராமாயணத் தொடர்புகளால் உலகப்புகழ் பெற்ற இம்மாவட்டத்தின் தொன்மையான வரலாறு, அழகன்குளம் மற்றும் தேரிருவேலி ஆகிய இடங்களில் நடைபெற்ற அகழாய்வுகள் மூலம் 2500 ஆண்டுகளுக்கும் மேல் பழமையானது என உறுதிப்படுத்தப்பட்டுள்ளது.

      அழகன்குளம் கி.மு.500 முதல் கி.பி.1200 வரை வெளிநாடுகளுடன் வாணிபம் செய்து பிரபலமாக இருந்த துறைமுக நகரம் ஆகும். தேரிருவேலி வரலாற்றுக் காலமான கி.மு.300 முதல் கி.பி.300 வரை மக்கள் வாழ்ந்த ஒரு ஊர் ஆகும்.

      ஏற்கனவே இராமநாதபுரம் மாவட்டத்தில் அழகன்குளம், தேரிருவேலி ஆகிய இரு இடங்களும் ரோமானியர் வணிக மையம் என்பது அறியப்பட்டுள்ளது. சமீபத்தில் மதுரை அருகில் கீழடியில் மத்திய தொல்லியல் துறையால் செய்யப்பட அகழாய்வு மூலம் அப்பகுதியில் ஒரு பெரிய நகரம் இருந்தது கண்டுபிடிக்கப்பட்டுள்ளது. மேலும் வைகையின் கரையில் 293 சங்ககால ஊர்கள் இருந்ததை மத்திய  தொல்லியல் துறையினர் கண்டுபிடித்துள்ளனர்.

      இராமநாதபுரம் அருகே உத்தரகோசமங்கையில் இருந்து திருப்புல்லாணி செல்லும் வழியில் கீழச்சீத்தை என்ற ஊரில் கானத்திடல் என்ற பகுதியில் பண்ணைக் குட்டை தோண்டிய இடத்தில், திருப்புல்லாணி அரசு மேல்நிலைப்பள்ளி தொன்மைப் பாதுகாப்பு மன்றப் பொறுப்பாசிரியர் (Convener of Heritage Club)  வே.இராஜகுரு, இராமநாதபுரம் மாவட்ட தலைமை அரசு மருத்துவமனை குழந்தைகள் நல மருத்துவர் டாக்டர் க.இராஜமோகன், தொன்மைப் பாதுகாப்பு மன்ற பத்தாம் வகுப்பு மாணவர்கள் முத்துக்குமார், இராபிட் ராஜ்குமார், விஜயகுமார், அழகேஸ்வரன், முரளிதரன், சக்திமுருகன், இரமேஸ்கண்ணன்,

பதினோராம் வகுப்பு மாணவன் முனியசாமி ஆகியோர் கள மேற்பரப்பாய்வு (Field Exploration) செய்தபோது, ரோமானிய ரௌலெட்டட் ஓடுகள் (Roman Rouletted Sherds), சீன போர்சலின் ஓடுகள் (Chinese Porcelain Sherd), கருப்பு சிவப்பு பானை ஓடுகள் (Black and Red Ware), சிவப்பு பானை ஓடுகள் (Red Ware), சிறு இரும்புக்கோடரி (Iron Axe), இரும்புத்தாதுக்கள் (Iron Ore), இரும்புக்கழிவுகள் (Iron Slags), குறியீடு உள்ள பானை ஓடுகள் (Pot Sherds with Graffiti Marks), நெசவுத்தொழிலுக்குப் பயன்படுத்தப்படும் தக்களி (Spindle Whorls), பாண்டி ஆட்டத்துக்குரிய சில்லுகள் (Hopscotches), சுடுமண் விளக்கு (Terracotta lamp), மான்கொம்புகள் (Deer Horns), மணிகள் செய்யப் பயன்படும் கற்கள், தேய்ப்புக் கற்கள் (Rubbing Stones), சங்குகள் (Conches), பவளப்பாறைகள் (Coral Reefs) ஆகியவற்றைக் கண்டு பிடித்தனர்.

கண்டெடுக்கப்பட்ட பொருள்கள்

அப்பகுதியில் 2 கி.மீ. சுற்றளவில் இத்தகைய ஓடுகள்  சிதறிக் கிடக்கின்றன. இங்கு கண்டெடுத்த பழம்பொருள்களைக் கொண்டு இங்கு சங்ககாலத்தில் ஒரு நகரம் இருந்துள்ளதை அறிய முடிகிறது. கருப்பு சிவப்பு பானை ஓடுகள்  கி.மு.300 முதல் கி.பி.200 வரையிலான சங்ககாலத்தில் மக்களால் அதிகமாகப்  பயன்படுத்தப்பட்டதால் இதை சங்ககாலப் பானை ஓடுகள் என்றே தொல்லியல் வல்லுநர்கள் அழைக்கிறார்கள்.

   

 

 

சுடுமண் விளக்கு

      ரோமானிய ரௌலெட்டட் ஓடுகள், சீன போர்சலின் ஓடுகள் ஆகியவை கிடைத்துள்ளதன் மூலம் இவ்வூரார், ரோமானியர் மற்றும் சீனர்களுடன் வணிகம் செய்திருப்பது உறுதியாகிறது. இம்மாவட்டத்தின் பழமையான ஊர்களாக அறியப்பட்டுள்ள  அழகன்குளம், தேரிருவேலி ஆகியவை ரோமானிய வணிக மையங்களாகும். ரோமானியர் கி.மு.300 முதல் கி.பி.100 வரை தமிழகத்துடன் வணிகம் செய்துள்ளனர். சீனர்கள் தமிழகத்துடன் கி.பி. 1௦௦௦ முதல் கி.பி.12௦௦ வரை நேரடி வணிகம் செய்துள்ளனர். எனவே இவ்வூர் கி.மு.300 முதல் கி.பி.1200 வரையிலான காலத்தில் சுமார் 15௦௦ ஆண்டுகள் புகழ் பெற்று விளங்கி இருந்திருக்கும்.

  

 

      இங்கு நெசவுத்தொழிலுக்குப் பயன்படுத்தப்படும் தக்களி கிடைத்துள்ளது. இதைக்கொண்டு நூல் நூற்கப் பயன்படுத்தி இருக்கலாம். இந்நூலைக் கொண்டு ஆடை நெய்து இருக்கலாம்.  அழகன்குளம், தேரிருவேலியிலும் இத்தகைய தக்களிகள் கிடைத்துள்ளன.

      சிறிய அளவிலான இரும்புக்கோடரி, இரும்புத்தாதுக்கள், இரும்புக்கழிவுகள் கிடைத்துள்ளதால் இரும்பு உருக்கும் தொழில் இங்கு நடைபெற்று இருந்திருக்கும்.

  

 

சங்குகள், பவளப்பாறைகள், மான் கொம்புகள் கிடைத்ததன் மூலம் இவற்றை  இவ்வூரிலிருந்து வெளிநாடுகளுக்கு ஏற்றுமதி செய்திருப்பார்கள் என அறிய முடிகிறது.  தமிழகத்திலிருந்து மான்கொம்புகள் ஏற்றுமதி செய்யப்பட்டதை சங்கப்பாடல்கள் மூலம் அறியலாம்.

    

 

      மணிகள் செய்யப் பயன்படுத்தும் கற்கள், தேய்ப்புக் கற்கள் கிடைத்துள்ளதால் இங்கு மணிகள் தயாரிக்கும் தொழில் நடந்திருக்கலாம். சுடுமண்ணலான விளக்கும் உடைந்த சுடுமண் உருவங்களும் கிடைத்துள்ளன.

 

            கருப்பு சிவப்பு பானை ஓடுகள், சிவப்பு பானை ஓடுகள், பழுப்பு நிற பானை ஓடுகள் சிலவற்றில் குறியீடுகள் காணப்படுகின்றன. திரிசூலம் (Trident) குறியீடு இரண்டிலும், ஏணி (Ladder) குறியீடு இரண்டிலும் உள்ள ஓடுகள் கிடைத்துள்ளன. இத்தகைய குறியீடுகள் அழகன்குளத்திலும் கிடைத்துள்ளன. இதுபோன்ற குறியீடுகளில் இருந்தே தமிழ் பிராமி எழுத்துக்கள் தோன்றியுள்ளன என்பது குறிப்பிடத்தகுந்தது.

      மேலும் கீழச்சீத்தையில் இருந்து 2 கி.மீ.  தூரத்தில் உள்ள வெள்ளா மறிச்சுக்கட்டி கண்மாயில் கள மேற்பரப்பாய்வு செய்தபோது கருப்பு சிவப்பு பானை ஓடுகள் மற்றும் கூரை ஓடுகள் கிடைத்துள்ளதால் அந்த இடத்திலும் சங்ககாலத்தில் ஒரு ஊர் இருந்திருக்கும் என அறியமுடிகிறது.

      இவ்விரு இடங்களும் தேரிருவேலியில் இருந்து 15 கி.மீ. தொலைவில் உள்ளன. இது மதுரை செல்லும் வணிகப்பாதையாக இருந்திருக்கலாம். எனவே இப்பகுதியில் தொல்லியல் துறையினர் முழு அளவிலான அகழாய்வு செய்து இவ்வூர் பற்றிய வரலாற்றுச் சிறப்பை அனைவரும் அறியச் செய்யவேண்டும்.

 கள மேற்பரப்பாய்வு பணியில்  திருப்புல்லாணி அரசு மேல்நிலைப்பள்ளி தொன்மைப் பாதுகாப்பு  மன்றத்தினரும் மருத்துவரும்